TIRANË- Një 56-vjeçar ka rënë në prangat e policisë së Tiranës pasi ditën e djeshme shkoi i plagosur në spital. Mësohet se 56-vjeçari i identifikuar me iniciale A.Sh ka dhunuar bashkëshorten e tij dhe më pas ka tentuar t’i japë fund vetes me armën e zjarrit që e mbante pa leje.
“Specialistët për Hetimin e Krimeve në Komisariatin e Policisë Nr. 3 arrestuan në flagrancë shtetasin A. Sh., 56 vjeç, banues në Tiranë, për veprat penale “Dhuna në familje” dhe “Mbajtja pa leje dhe prodhimi i armëve, armëve shpërthyese dhe i municionit”.
Ky shtetas është paraqitur ditën e djeshme, në Spitalin e Traumës, me dëmtime të shaktuara nga përdorimi i armës së zjarrit. Nga veprimet hetimore ka rezultuar se ky shtetas, ditën e djeshme, ka ushtruar dhunë ndaj bashkëshortes së tij dhe më pas ka tentuar të vrasë veten me armën e zjarrit që e mbante pa leje,”- njofton Policia. 56-vjeçari shkoi vetë dje në spitalin e Traumës për të marrë ndihmën e parë mjekësore.
