Ukraina ka deklaruar se ka vënë në pranga shtatë persona të dyshuar për dorëzimin e koordinatave tek forcat ruse për sulmet në rajonin lindor të Dnipropetrovsk, ku dhjetëra civilë u vranë kohët e fundit në një sulm me raketa. Shërbimi i sigurisë SBU tha në një deklaratë se kishte kryer një operacion me shumë faza për të ekspozuar një rrjet aktiv të inteligjencës ushtarake të Rusisë dhe se si rezultat u arrestuan “shtatë agjentë rusë”.
“Të arrestuarit u dhanë rusëve koordinatat e objekteve kritike të infrastrukturës, duke përfshirë ndërmarrjet e energjisë”, thuhet në deklaratën e tyre, pa specifikuar nëse të arrestuarit ishin rusë apo ukrainas.
Forcat ruse kanë shënjestruar për disa muaj infrastrukturën energjetike të Ukrainës në një valë sulmesh që kanë ndërprerë furnizimin me ujë, ngrohje dhe energji elektrike për miliona njerëz dhe kanë nxitur ndërprerjet e vazhdueshme të energjisë elektrike, shkruajnë mediat e huaja.
“Informacionet për përfshirjen e mundshme të të arrestuarve në sulmin me raketa ruse në një ndërtesë banimi në Dnipro më 14 janar 2023 janë duke u kontrolluar”, shtoi SBU.
Javën e kaluar, një raketë ruse hapi anën e një ndërtese banimi në Dnipro, qyteti kryesor i rajonit të Dnipropetrovsk, duke lënë dhjetëra të vdekur. SBU lëshoi një video së bashku me deklaratën që tregon agjentë ukrainas të maskuar dhe të armatosur rëndë duke kryer arrestime në disa rezidenca.
