15 vjeçari Imad Khaled Saleh Hashash, ka vdekur dje nga një plagë plumbi në kokë gjatë një proteste të ashpër në tokat e pushtuara të Bregut Perëndimor, teksa vijon të rritet numri i fëmijëve palestinezë të vrarë nga Izraeli.
Vrasja e 15-vjeçarit ndodhi teksa forcat izraelite sulmuan një kamp refugjatësh në Nablus.
Ministria palestineze e mbrojtjes tha se Imad Khaled Saleh vdiq të martën pas plagës së plumbit të marrë në kampin e refugjatëve Balata.
Ushtria izraelite tha se kishte kryer operacionin e natës në kamp për kapjen e një “të dyshuari”.
“Gjatë misionit u përdorën plumba zjarri. Ushtarët qëlluan ndaj tarracave të ndërtesave pasi po qëlloheshin prej andej”, tha në një deklaratë ushtria.
Hamas, grupi palestinez që qeveris Rripin e Gazës lëshoi një deklaratë për zinë e vdekjes së Saleh. Grupi gjithashtu tha se vlerësonte rezistencën e palestinezëve në kampin e Balata që refuzuan forcat izraelite gjatë sulmit.
Ushtria izraelite tha se trazirat nisën gjatë operacionit, ku rezidentët lëshonin gurë nga ndërtesat drejt trupave izraelite.
“Gjatë trazirave një person u pikas me një objekt të madh në dorë, duke tentuar ta lëshonte mbi ushtarët poshtë ndërtesës. Një prej ushtarëve hapi zjarr dhe u krye goditja,” thuhej në deklaratën e ushtrisë, pa komentuar mbi vdekjen e adoleshentit.
Dhuna fatale ndaj palestinezëve është e zakonshme në Bregun Perëndimor, territori palestinez që Izraeli ka pushtuar prej vitit 1967.
Në fillim të muajit katër të rinj palestinezë u vranë nga ushtarët izraelitë në kampin relativisht të qetë të refugjatëve në Xhenin.
Dhuna ka ardhur në rritje teksa armëpushimi i ndërmjetësuar nga Egjipti po përkeqësohet. Dje Egjipti njoftoi mbylljen e pikës kufitare me Gazën, duke cituar si arsye veshtirësitë me bisedimet e armëpushimit.
