Dhjetra emigrantë të paligjshëm janë kapur në një furgon në qytetin e Pogradecit, ndërkohë që pamjet po bëjnë xhiron e rrjetit.
Në videot e siguruara nga A2, shihet sesi nga një furgon mallrash dalin një numër i madh emigrantësh, të cilër largohen me shpejtësi në rrugët e qytetit.
Në pamje duket një efektiv policie, i cili pasi kishte ndaluar furgonin, po përpiqej të mbante derën mbyllur që emigrantët klandestinë të mos largoheshin. Por pas disa shtyrjesh, efektivi nuk e ka ndalur dot arratinë e tyre.
Në një moment efektivi i policisë shihet teksa nxjerr pistoletën, por më pas e rifut në këllëf, duke e kuptuar se e ka të pamundur t’i ndalë të gjithë. Nuk ka informacion se nga cili shtet ishin këta emigrantë klandestinë, por ndërkohë, është identifikuar drejtuesi i furgonit dhe po punohet për kapjen e tij.
Shqipëria prej muajsh është bërë një rrugë kalimi i mijëra emigrantëve që vijnë nga vendet e treta dhe synojnë kalimin drejt shteteve të BE-së.