DEVOLL- Zbardhet ngjarja e ndodhur dje në fshati Menkulas. 62-vjeçari, Vasil Babinis, që goditi me sëpatë një të moshuar në Devoll është vënë në pranga, disa orë pas hetimeve të Policisë së Shtetit. Fillimisht ngjarja u raportua si aksidentale, më pas u bë me dije se 73-vjeçari, Vasil Begolli banues në fshatin Menkulas, fillimisht ka deklaruar në polici se ishte rrëzuar në oborrin e banesës së tij.
Por pas hetimeve rezultoi se i moshuari është goditur në kokë me sëpatë nga 62-vjeçari, i cili u vendos menjëherë në pranga. Ndërkohë që Begolli u transportua në Spitalin e Traumës Tiranë, për mjekim të specializuar. Hetimet vazhdojnë për të zbuluar shkakun e sherrit mes të dyve që ka sjellë edhe tentativën për vrasje.
NJOFTIMI I POLICISË:
Devoll | Finalizohet operacioni policor i koduar “Menkulas”. Zbardhet ngjarja e ndodhur pasditen e djeshme, në fshatin Menkulas, ku një shtetas tentoi të vriste me mjet të fortë (sëpatë), një 73-vjeçar. Falë veprimeve hetimore të Policisë u identifikua dhe u vu në pranga autori i dyshuar i ngjarjes, e cila fillimisht u raportua si ngjarje aksidentale.
Shërbimet e Komisariatit të Policisë Devoll, pasditen e djeshme, pas marrjes së njoftimit se në spitalin e Bilishtit, kishte shkuar për ndihmë mjekësore një shtetas i dëmtuar në kokë, menjëherë kanë shkuar në spital, me qëllim verifikimin e rastit. Shtetasi i dëmtuar Vasil Begolli, 73 vjeç, banues në fshatin Menkulas, Devoll, ka deklaruar fillimisht përpara oficerit të policisë gjyqësore se ishte rrëzuar aksidentalisht, në oborrin e banesës së tij.
Falë hetimeve të thelluara, në kuadër të operacionit policor të koduar “Menkulas”, u bë e mundur zbardhja e rrethanave të kësaj ngjarjeje. Nga provat e siguruara nga hetimi rezultoi se shtetasi Vasil Babinis, 62 vjeç, banues në Bilisht, Devoll, për motive të dobëta, kishte goditur me mjet të fortë (sëpatë), në kokë, 73-vjeçarin, i cili do të transportohet nga spitali i Korçës në Spitalin e Traumës Tiranë, për mjekim të specializuar. Në vijim të veprimeve procedurale, specialistët për Hetimin e Krimeve të Komisariatit të Policisë Devoll arrestuan në flagrancë shtetasin Vasil Babinis, 62 vjeç, banues në Bilisht, Devoll, për veprën penale “Vrasja me dashje”, mbetur në tentativë.
