Gjatë një interviste mëngjesin e sotëm, Ledina Beqiraj Agalliu, drejtoreshë e Drejtorisë së Përgjithshme të Pronësisë Industriale (DPPI) prezantoi disa prej atyre që njihen si marka shqiptare, si Keci i Hasit, Jufkat e Dibrës, Vaji i Borshit, Boronica e Bjeshkëve, Kukësit dhe Tropojës, Gështenja e Malësisë së Madhe dhe Tropojës etj, tanimë janë produkte të regjistruara dhe u njihet me ligj pronësia industriale.
DPPI është institucioni i vetëm nëpërmjet të cilit shteti shqiptar jep të drejtat mbi patentat mbi shpikjet dhe modelet e përdorimit, markat tregtare dhe të shërbimit, dizenjot industriale dhe treguesit gjeografikë, duke iu njohur mbajtësve të së drejtave pronësinë mbi këto objekte, nëpërmjet regjistrimit të tyre.
Gjatë bisedës, Isli Islami e pyeti drejtoreshën e DPPI-së për rastet kur dy marka mund të kenë ngjashmëri me njëra-tjetrën në elementë të ndryshëm. Si logoja për shembull.
Ajo u shpreh se “Për’Puthen” është në proces regjistrimi pranë drejtorisë për Pronësinë Industriale dhe aktualisht është goditur nga një objekt ndërkombëtar, shumë i njohur, siç është Apple.”
Beqiraj-Agalliu tha se Apple është një kompani që tregohet e kujdesshme për të kontrolluar nëse dikush në treg tenton të ketë logo të ngjashme me të,siç është logoja e mollës.
Në DPPI janë disa procedura që duhen ndjekur, përpara se çështja të kalojë në gjykatë. Është një procedurë lehtësuese për të shkurtuar afatet, reduktuar kostot e gjykatës dhe funksionon si dhomë kundërshtuese. Në këtë fazë, pritet që palët të bien në një marrëveshje.Nëse jo,atëherë apelohet te bordi i apelit.
Drejtoresha u shpreh se subjektet tregtare ndërkombëtare kanë një interes të shtuar për tregun shqiptar.