TROPOJË – Deputeti i Partisë Demokratike në Tropojë Isuf Çelaj reagoi i indinjuar për shkrirjen e gjykatës së këtij qyteti si pasojë e vendimit të qeverisë që do të krijiojë një gjykatë qendrore në Tiranë.
Përfaqësuesi i Qarkut të Kukësit në Parlament shprehet në profilin e tij në “Facebook” se “qyteti po izolohet qëllimisht nga drejtësia”. Ai i kërkon ministrit të Drejtësisë Ulsi Manja të kuptojë se një banori tropojan i duhen 220 km udhëtim vajtje-ardhje për të marrë qoftë dhe një firmë në kryeqytet. Ai i kërkoi grupit të punës që do të përcaktojë hartën e re gjyqësore të provojnë rrugën e mundishme të Tropojës.
Çelaj i bën apel qeverisë që të mos rëndojë qytetin e varfër të Tropojës.
Postimi i Isuf Çelajt:
Tropoja rrezikon të izolohet edhe nga drejtësia.
Siç e kam theksuar në fjalën time në seancën plenare të datës 14 tetor, ndjej sërish detyrimin në emër të banorëve të Tropojës që të ngre përsëri shqetësimin e madh për shkrirjen e Gjykatës së Tropojës, çka do të sjellë një ndëshkim për banorët e Tropojës.
Në emër të qytetarëve dua ti bëj thirrje ministrit të drejtësisë, Ulsi Manja, duke qenë se është nga veriu dhe e di fort mirë se çfarë do të thotë për një banor të varfër të Tropojës të udhëtojë 110 kilometra vajtje e po kaq në kthim vetëm e vetëm për një firmë apo për një çeshtje të thjeshtë gjyqësore, meqë ministrja e mëparshme e drejtësisë as e kishte haberin dhe as e mori ndonjëherë mundimin që të mendojë njëmijë e një hallet që krijon mungesa e drejtësisë në Tropojë: Mos ia bëni këtë tropojanëve. Mos e izoloni këtë trevë që vuan kushtet më të rënda ekonomike dhe sociale.
Një apel e kam edhe për grupin e punës që po merret me hartën e re gjyqësore, që para se ti vënë kyçin derës së drejtësisë në Tropojë, të marrin mundimin e ta bëjnë njëherë atë rrugë e të kuptojnë se çfarë kosotoje sjell transferimi i Gjykatës nga B.Curri në Kukës.
Banorët e Tropojës nuk duan që të mbyllet institucioni i vetëm i drejtësisë, ndaj dhe unë në emër të tyre iu bëj thirrje sa ende jemi në kohë: Mos e ndëshkoni Tropojën! Mos ia shtoni hallet tropojanëve të varfër e të izoluar nga mungesa e vëmendjes së shtetit e pushtetit gjygjësor. Mos ia mbyllni derën e vetme ku mund të marrin drejtësi. Gjykata e Tropojës jo vetëm që nuk duhet mbyllur, por përkundrazi ajo duhet të rikonstruktohet e të investohet në paisje e mjete të punës si dhe me burime njerëzore të kualifikuara e të vihet në shërbim të njerëzve që kanë kaq shumë nevojë që të marrin të drejtën e tyre pa kostot e shumta që krijon transferimi në Kukës i saj.
Mos e vrisni shpresën për drejtësi të këtyre qytetarëve.
Tropoja do drejtësi dhe jo ndëshkim me mungesë të drejtësisë dhe institucionit të saj!
