Fituesja e çmimeve kombëtare e ndërkombëtare dhe e përkthyer në mbi 30 gjuhë të botës, shkrimtarja e mirënjohur bashkëkohore bullgare, Zdravka Etimova, vjen në Shqipëri në një takim me shkrimtarë dhe njerëz të artit në ditën e kulturës bullgare.
Etimova ka vlerësuar qytetarët shqiptarë për modestinë, shpirtin luftarak dhe dashurinë ndaj gjuhës.
“Mendoj se ne si dy vende kemi shumë ngjashmëri me njëri-tjetrin, na bashkon shpirti luftarak, dashuria ndaj gjuhës. Gjuha shqipe është unike, është një ndër gjuhët më të vjetra dhe është detyrë e institucioneve që ta ruajnë dhe mbrojnë”, u shpreh shkrimtarja.
Shkrimtarja dhe përkthyesja Milena Selimi premtoi për lexuesin shqiptar se shumë shpejt autoren bullgare do ta kemi të përkthyer edhe në shqip.
“Tashmë jemi në një proces të shumë librave që i përkasin autorëve shqiptarë të cilët shumë shpejt do të përkthehen në gjuhën bullgare. Mendoj se është moment që ta ftojmë njëri-tjetrin dhe të mësojmë po ashtu nga njëri tjetri”, tha Selimi.
Zdravka Evtimova e quan veten një shkrimtare treni pasi shumica e historive të saj janë shkruar në tren, gjatë udhëtimit të saj midis Pernikut (qytetit ku banon) dhe Sofjes (qytetit ku punon). Ajo shquhet për stilin dhe narrativën e veçantë ndaj dhe ka sot mijëra lexues kudo në botë.
