Një ngjarje e rëndë ka ndodhur mbrëmjen e djeshme, rreth ores 19:00 në aksin rrugor Tepelenë-Memaliaj ku një aksident tragjik ka marrë jetën e 4 personave.
Tre automjete janë përfshirë në aksidentin në bypassin e Tepelenës, poshtë kalasë së qytetit. Automjeti, i cili ka ardhur në drejtimin jugor ka humbur kontrollin, duke u përplasur kështu me dy automjete të tjera që qarkullonin në drejtim të kundërt.
Fillimisht ka ngelur i vdekur në vend drejtuesi i mjetit, e më pas, edhe 3 prej pasagjerëve ndërruan jetë.
Forcat zjarrfikëse kanë nxjerrë personat e bllokuar në automjete, por fatkeqësisht nuk kanë mbijetuar dot.
Viktimat e këtij aksidenti janë;
– Riza Rapaj, 42 vjeç
– Lavdosh Bega, 62 vjeç
– Lefteri Bega, rreth 57 vjeçe,
– Afërdita Bega, rreth 85 vjeçe.
Teksa po punohet për zbardhjen e plotë të rrethanave të aksidentit, dyshohet se shkak për humbjen e kontrollit të mjetit që shkaktoi aksidentin, mendohet të ketë qenë rrëshqitja në terren të lagësht, dhe shpejtësia mbi normën.
Lidhur me këtë ngjarje të rëndë, ka reaguar edhe ministri i Brendshëm Taulant Balla, i cili nëpërmjet një postimi në ‘Facebook’, u shpreh i pikëlluar, duke vënë theksin tek zbatimi i përpiktë i rregullave të qarkullimit e rritjen e forcës parandaluese nga Policia e Shtetit.