Elbasan, 13 maj 2025 – Drejtoria Vendore e Policisë Elbasan ka intensifikuar kontrollet dhe veprimet procedurale, duke realizuar disa arrestime në flagrancë dhe duke referuar materiale në Prokurori për një sërë shkeljesh të ndryshme.
Specialistët e Qarkullimit Rrugor kanë arrestuar në flagrancë shtetasin L. H., 39 vjeç, pasi u kap duke drejtuar automjetin në aksin “Shijon-Elbasan”, në gjendje të dehur dhe pa leje drejtimi. Po ashtu, u arrestua E. H., 30 vjeç, i cili, në fshatin Çengelaj, humbi kontrollin e mjetit për shkak të gjendjes së dehur, duke pësuar dëmtime të lehta.
Në një tjetër rast, Xh. M., 46 vjeç, u arrestua pasi automjeti që ai drejtonte u përplas me një mjet tjetër me drejtues A. L., 36 vjeç, në aksin “Elbasan-Librazhd”. Nga përplasja u lënduan dy pasagjerë që ndodhen nën kujdesin e mjekëve.
Ndërkohë, për një aksident në aksin “Librazhd-Elbasan” mes mjeteve të drejtuara nga A. H., 37 vjeç, dhe B. C., 43 vjeç, janë dëmtuar lehtë 4 pasagjerë. Për këtë rast është nisur procedim penal ndaj A. H.
Specialistët për Hetimin e Krimeve të Komisariatit të Librazhdit kanë referuar në Prokurori materialet për procedim penal ndaj Q. Gj., 57 vjeç, i cili goditi me grushte dhe mjete të forta shtetasin I. M., 43 vjeç, për motive të dobëta.
Po ashtu, është nisur procedim ndaj P. B., 67 vjeç, pas kallëzimit të mësueses A. K., 56 vjeçe, e cila deklaroi se është fyer nga ky shtetas për shkak të detyrës së saj si arsimtare në një gjimnaz.
Policia e Gramshit procedoi penalisht shtetasin L. Z., 53 vjeç, i cili akuzohet për kanosje dhe fyerje ndaj shtetasit L. Z., 58 vjeç.
Ndërkohë, më 12 maj është paraqitur në polici shtetasi D. M., 37 vjeç, i cili raportoi largimin nga banesa të djalit të tij 17-vjeçar, që prej datës 24 prill. Policia po punon për gjetjen e tij.
Të gjitha materialet procedurale janë referuar në Prokurorinë pranë Gjykatës së Shkallës së Parë të Juridiksionit të Përgjithshëm Elbasan, për veprime të mëtejshme hetimore.
