SHBA- Autori i dyshuar për atentatin e djeshëm ndaj ish-presidentit Donald Trump përballet me akuzën për krime federale me armë. Ryan Routh përballet me akuzat për posedim të një arme zjarri, pavarësisht se ishte i dënuar edhe më herët dhe posedonte një armë zjarri me një numër serial të fshirë.
Akuza shtesë dhe më të rënda mund të bashkangjiten në vazhdim ndërsa hetimet për ngjarjen vijojnë. Sipas raportimeve të mediave të huaja sjellja e tij në gjykatë ishte e paqëndrueshme dhe e njëjtë me atë që ishte dje kur u vu në pranga pasi u arratis nga fusha e golfit ku ishte Trump.
Seanca e shkurtër gjyqësore në gjykatën e vogël federale të Palm Beach paraqiti disa detaje mjaft personale rreth të dyshuarit Routh, pasi atij iu drejtuan një sërë pyetjesh për të përcaktuar nëse ai kualifikohej për një mbrojtës publik.
Ai u pyet se sa para kishte në llogarinë e tij bankare, për të cilën ai u përgjigj “zero fonde”. Banori i Karolinës së Veriut i tha gjykatës se ai fitonte rreth 3,000 dollarë në muaj dhe kishte vetëm dy pasuri – dy kamionë në Hawaii me vlerë rreth 1,000 dollarë secili.
