LUSHNJE- Kryetari i Partisë Demokratike, Sali Berisha ka zhvilluar sot një takim me mbështetësit e tij në Lushnje. Ai tha se fermerët janë lënë në harresë, ndërsa shtoi se nuk ishte parë të ndodhte kurrë që një qeveri të parashikojë 30 mln euro investim në të gjithë bujqësinë shqiptare. Sipas tij, në buxhetin e këtij viti, për fermerët që përbëjnë 40% të popullatës, parashikohen gjithsej 30 mln euro dhe prej atyre ju garantoj se të paktën 20 i futin në xhepa, qeveritarët dhe administratorët e tyre.
Pjesë nga deklarata:
Të dashur, demokratë e demokrate të Lushnjes, Divjakës, mirëmbrëma dhe një përshëndetje të përzemërt dhe një falënderim për praninë tuaj sot në këtë takim, i cili ka për qëllim një besëlidhje, ka për qëllim një premtim të demokratëve të Lushnjes, për të marrë përsipër misionin e madh, shpëtimtar të Lushnjes dhe Shqipërisë.
Ne vijmë sot në këtë takim pas 10 vitesh, një opozite drobitëse, pas 10 vitesh në të cilat ne demokratët kemi parë para syve tanë se si, Edi Rama shpërbëri arritjet 30 vjeçare të demokracisë.
Ne pamë, para syve në këto 10 vite se si vota jonë, vullneti ynë, humbi vlerën e vet. Ne pamë se si këto 10 vite lumenjtë e djersës, mundit të fermerëve, biznesmenëve, qytetarëve të Lushnjes, u shpërbënë, u dëmtuan.
Ne pamë se si këto 10 vite u krye një gjenocid i vërtetë në kuptimin e krijimit të kushteve për largimin nga vendi.
Ne pamë gjatë këtyre 10 viteve, se si ekonomitë e fermerëve shqiptarë u përgjysmuan, se si u adaptua një politike strikte, armiqësore. Mjafton të kujtoj këtu se në buxhetin e këtij viti, për fermerët që përbëjnë 40% të popullatës, parashikohen gjithsej 30 mln euro dhe prej atyre ju garantoj se të paktën 20 i futin në xhepa, qeveritarët dhe administratorët e tyre.
Nuk ka ndodhur ndonjëherë kurrë që nga themelimi i shtetit shqiptar, dhe më këtë nënkuptoj qeverinë e vendosur para Kongresit të Lushnjes, që fermerët e këtij vendi të kenë qenë më të braktisur.
Nuk ka ndodhur ndonjëherë kurrë që një qeveri të parashikojë për investim gjithsej 30 mln euro në të gjithë bujqësinë shqiptare.
