Një eksperiment i gazetares së shëndetit në BBC, Melissa Hogenboom, tregon se shmangia e sheqerit të shtuar për gjashtë javë mund të sjellë ndryshime të dukshme në energji, oreks dhe gjendjen mendore.
Sipas saj, ndërprerja e sheqerit nuk është e thjeshtë, pasi ai gjendet jo vetëm në ëmbëlsira, por edhe në ushqime të përditshme si buka apo produktet e gatshme.
Ditët e para: dëshira të forta dhe lodhje
Në fillim të eksperimentit, ajo përjetoi dëshira të forta për ëmbëlsira dhe vështirësi në situata sociale, gjë që ekspertët e lidhin me aktivizimin e sistemit të shpërblimit në tru.
Sheqeri, sipas specialistëve të cituar, rrit dopaminën dhe mund të krijojë sjellje të ngjashme me varësinë.
Pas disa javësh: stabilizim i energjisë
Rreth javës së tretë, dëshira për sheqer filloi të ulet. Trupi përshtatet gradualisht dhe shijet bëhen më të ndjeshme ndaj ëmbëlsisë natyrale nga frutat dhe ushqimet e tjera.
Ekspertët e shëndetit theksojnë se reduktimi i sheqerit mund të ndihmojë në uljen e luhatjeve të glukozës në gjak dhe përmirësimin e energjisë gjatë ditës.
Çfarë ndodh kur rikthehet sheqeri
Pas gjashtë javësh, konsumimi i një ëmbëlsire nuk jep të njëjtin kënaqësi si më parë. Në disa raste, ai mund të shoqërohet me rënie të menjëhershme të energjisë dhe ndjenjë lodhjeje.
Eksperimenti përfundoi me vendimin për ta kufizuar sheqerin në mënyrë të moderuar, kryesisht vetëm në fundjavë.
Studimet e cituara në artikull lidhin konsumimin e lartë të sheqerit me rrezikun për obezitet, diabet të tipit 2 dhe probleme metabolike, duke e konsideruar një nga faktorët kryesorë të sëmundjeve të dietës moderne.
