Kreu i BDI-së Ali Ahmeti, ka deklaruar se Bujar Osmani është kandidati i BDI-së për president në Maqedoninë e Veriut.
Në një reagim në “Facebook”, Ahmeti ftoi qytetarët që ta përkrahin Bujar Osmanin për president të RMV.
Me sloganin “Jo Rusisë, po Evropës”, ai gjithashtu ka bërë thirrje që të ndalohet njëherë e mirë ndikimi i Rusisë në Ballkan.
“Jemi dëshmitarë që na pamundësohet anëtarësimi në BE dhe të na rikthehet izolimi. Maqedonia është vend i vogël në udhëkryq të civilizimeve. Prandaj iu ftoj që të bëhemi bashkë ta zhvillojmë betejën e fundit të luftës së përjetshme dhe t’i themi bashkërisht ‘jo Rusisë, po Evropës’”, tha Ahmeti.
Kandidatet për president: Stevo Pendarovski, Bujar Osmani, Arben Taravari, VMRO me deputeten Gordana Siljanovska, ndërsa partia “Levica” kandidon me profesoreshën Biljana Vankovska.
Lajmi i infoweb media një ditë më parë:
Ministri i Jashtëm, Bujar Osmani, kandidat për President i Maqedonisë së Veriut
21 Shkurt, 2024
Ministri i Jashtëm i Maqedonisë së Veriut, Bujar Osmani, pritet të jetë kandidati zyrtar për President në vendin fqinje.
Burime të sigurta brenda BDI, bëjnë me dije për Infoweb Media, se kjo forcë politike do të propozojë Osmanin për President.
Sot, kryetari i BDI, Ali Ahmeti, njoftoi se nesër ‘do të japë një lajm të madh’ dhe duket se bëhet fjalë pikërisht për kandidaturën e Ministrit të Jashjtëm aktual, Bujar Osman, për këtë post.
Shanset e zgjedhjet se shqiptarit të parë President në Maqedoninë e Veriut janë të mëdha po të mbajmë parasysh ndarjen e mundshme të pushteteve pas zgjedhjeve që vijnë, ku postin e Kryeministrit e merr një maqedonas dhe atë të Presidentit një shqiptar.
Kjo i siguron Maqedonisë së Veriut stabilitet politik, por edhe i çel mjaft prespektiva evropiane duke dëshmuar se është një vend që garanton siguri dhe paqe në rajon.
Aktualisht Maqedonia e Veriut udhëhiqet nga Kryeministri Shqiptar, Talat Xhaferri. Infoweb Media
