Mediat kosovare raportojnë se një vajzë e re nga Kosova ka humbur jetë nga përmbytjet katastrofike në Gjermani.
Bëhet fjalë për Vanesa Koxha, e cila është me prejardhje nga Kaçaniku, ndërsa lajmi për humbjen e saj u bë i ditur nga familjarët fillimisht në rrjetet sociale.
“Më pikëllim të thellë ju njoftojmë se vajza jonë ndërroi jetë në vërshimin tragjik në Gjermani. Varrimi do të bëhet këtu,”-shkruan i afërmi i saj.
Dje u raportua edhe për vdekjen e një çifti po nga Kosova, por nuk është konfirmuar ende zyrtarisht. Deri më tani në Gjermani kanë vdekur afër 200 persona e shumë të tjerë vazhdojnë të mbeten ende të zhdukur.
Aktualisht në Gjermani po bëhet pastrimi masiv nga përmbytjet, ndërsa Qeveria po shqyrton një paketë ndihme prej rreth 400 milionë eurosh.
