Në natën e fundit të muajit të ‘Ramazanit’ është ekzekutaur me breshëri plumbash të kallashnikovit, biznesmeni shqiptar Kamer Idrizi, 42 vjeç, banues në Shkup. Viktimë e këtij sulmi mbeti edhe kushëriri i tij, 22 vjeçar i cili po udhëtonte në të njëjtën makinë me biznesmenit.
Ngjarja e rëndë ndodhi mesnatën e kaluar në lagjen Butel të Shkupit, në kryqëzimin e bulevardeve “Bosnjë dhe Hercegovinë” dhe “Hristijan Todorovski-Karpos”.
Idrizi po udhëtonte me automjetin e llojit ‘Golf 7”, bashkë me të riun 22 vjeç, me inicialet E.I., në momentin që persona të maskuar i bënë pritë dhe e qëlluan me mbi 80 plumba kallashnikovi. Idrizi vdiq në vend, ndërsa 22-vjeçari që e prekën gjashtë plumba u dërgua në urjgenë për të marrë ndihmën e nevojshme mjekësore, por fatkeqësisht ndërroi jetë.
Policia dhe grupi hetimor kanë shkuar në vendin e ngjarjes, kanë rrethuar zonën dhe kanë mbledhur prova të cilat mund të çojnë në identifikimin e autorëve. Deri më tani nuk ka asnjë të arrestuar për krimin e dyfishtë. Pista ku po hetohet është e shkuara e errët e vetë Idrizit.
Kamer Idrizi njihej si një biznesmen i fuqishëm dhe një person problematik në zonë. Më shumë ai u bë i njohur për publikun e gjërë në vitin 2019, kur disa persona të maskuar, gjuajtën dhjetëra plumba ndaj hotelit të tij ‘Alexander Palace’ në Shkup.
Fatmirësisht Kamer Idrizi bashkë me miqtë e tij Jeton Krivanjeva, Afrim Sulimani dhe Ensar Iseni, shpëtuan, por siç duket personat në fjalë u rikthyen dy vite më vonë. Dyshohet se mes tyre ka pasur probleme për shkak të tregut të lëndëve narkotike.