Banka e nivelit të dytë, FiBank, i ka dorëzuar deputetëve të Komisionit Hetimor për inceneratorët të dhënat e një shtetasi, duke qenë kështu në shkelje ligjore. Përmbi këtë fakt, të dhënat e dorëzuara, nuk janë as ato të sakta, pasi banka ka ngatërruar shtetas!
Sipas formularit që disponon Albanian Post, banka i ka kthyer përgjigje deputetes së Partisë Demokratike, Jorida Tabaku.
FiBank, në këtë përgjigje, thotë se shtetasi Klodian Zoto, ka llogari aktive në këtë bankë. Ai është i datëlindjes 13 shkurt 1990, pra 31 vjeç dhe mban pranë kësaj banke numrin e llogarisë “AL62 2152 1078 ALL1 0000 0665 9200”.
Mirëpo, shtetasi Klodian Zoto i inceneratorëve, nuk është 31 vjeç në të vërtetë, por shumë vite më i madh në moshë.
Në këtë rast, komisioni, që sipas deputetëve të opozitës ka të gjitha atributet e organeve të hetimit të drejtësisë, me përjashtim të ndjekjes penale, nuk ka zbatuar as praktikën më elementare të organeve të drejtësisë në lidhje me kërkesën. Një kërkesë informacioni e tillë, në rastet kur dërgohet nga organet hetimore të drejtësisë përmban minimalisht emrin, mbiemrin, datëlindjen, vitlindjen dhe atësinë.
Në kërkesën që kryetarja e Komisionit Hetimor, Jorida Tabaku u ka dorëzuar bankave dhe të siguruar nga Albanian Post shihet qartë dërgimi i saj i paplotë, por vetëm me emër, mbiemër për personat që kërkon llogaritë, pa përcaktuar atësinë, pa datëlindje, pa vitlindje dhe të tjera të dhëna të domosdoshme.
Kërkesa bazohet në dy nene të ligjit për Komisionet Hetimore. Por, asnjëri prej ligjeve, nuk i jep të drejtën komisionit vetë apo deputetëve, të marrin në zotërim llogaritë e qytetarëve.
Në nenin 13 pika katër, thuhet se “Kërkesa për hetime ose marrje provash nga çdo anëtar i komisionit pranohet nga komisioni pa votim”.
Nga ana tjetër, në pikën B të nenit 17, thuhet se “(Komisioni) thërret titullarë institucionesh për pyetje, si dhe kërkon nga ata informacione, ose dokumente zyrtare”. Edhe kjo, me kushtin që sipas përcaktimeve të pikës një të nenit 15, të jenë informacione publike.
Llogaritë bankare të qytetarëve, nuk janë të tilla.
Në vend të kësaj kërkese, ajo çfarë Komisioni ka dërguar në të vërtetë, është vetëm emri dhe mbiemri i shtetasit. Banka në këtë rast, ka kryer shkelje, duke i dërguar Komisionit të dhënat e një 31-vjeçari, pa kërkuar verifikime të mëtejshme.
Ndërkohë, siç mëson Albanian Post, banka i ka kërkuar Komisionit të vendosë në dispozicion atësinë, për të kryer konfirmimin.
Në këtë rast, ky është një dëm ndaj shtetasit 31-vjeçar Klodian Zoto, të cilit i janë shkelur të drejtat e privatësisë.
Pra, banka u ka ofruar deputetëve të dhënat e një qytetari, që jo vetëm s’ka lidhje me objektin e hetimit të Komisionit, por edhe nëse do të kishte sërish do të përbënte shkelje të ligjit të privatësisë, Kushtetutës, vendimeve të Gjykatës Kushtetuese dhe të konventave ndërkombëtare të ratifikuara nga Shqipëria që mbrojnë privatësinë dhe të drejtat e tjera që lidhen me të.
Nga të dhënat e dorëzuara nga FiBank rezulton se llogaria është çelur në datë 16 qershor të 2013-s, është ende aktive dhe ka një balancë prej rreth 213 mijë lekësh. Bashkë me këto të dhëna, deputetëve u është dorëzuar edhe i gjithë historiku i transfertave.
Kjo ngjarje, mundet fare mirë të shndërrohet në një precedent të rrezikshëm, sepse në bazë të logjikës së përdorur nga banka, cilido person i veshur me pozicionin e deputetit, mund t’i dërgojë një shkresë për të ditur gjendjen e llogarisë së cilitdo person.
Pra, vendimi i FiBank mund të ketë pasoja edhe të mëtejshme. Që nga shkelja e privatësisë, e sekretit bankar apo shkelje të tjera më të rënda, të cilat mund të përbëjnë deri në shkelje si vepër penale.
