Filiali i një poste private është grabitur mbrëmjen e kësaj të mërkure (17 maj). Ngjarja ka ndodhur në rrugën “5 maji” në Tiranë, ku një person ende i paidentifikuar është futur brenda ambienteve dhe nën kërcënimin e një thike ka arritur të marrë një shumë parash dhe më pas është larguar.
“Më datë 17.05.2023, rreth orës 21:15, në rrugën “5 Maji”, një person ende i paidentifikuar, i cili mbante një send të dyshuar si mjet prerës, është futur në filialin e një poste private, ka marrë një shumë parash dhe është larguar me një motomjet. Grupi hetimor ndodhet në vendngjarje dhe po punon për identifikimin dhe kapjen e autorit”, sqaron policia.
Ndërkohë shërbimet e Policisë kanë ngritur pika kontrolli dhe po krehin zonën, për të bërë të mundur kapjen e autorit.
