Ilir Meta uron Briken Çaljan pas dy medaljeve në Europian

0

Presidenti i vendit Ilir Meta ka uruar peshngritësin Briken Çalja për dy medaljet e marra në Kampionatin Europian të Peshëngritjes që po mbahet në Moskë.

Meta shprehet se sportistë të kalibrit të Çaljas, janë ata që na nderojnë dhe na bëjnë krenar, ndërsa shton se faqezinjtë e politikës, janë ata që dëmtojnë imazhin ndërkombëtar të vendit.

“Duhet t’u jemi përherë mirënjohës dhe mbështetës të gjithë sportistëve elitarë kuqezinj si Brikeni, të cilët e lartësojnë flamurin dhe imazhin e Shqipërisë, aty ku faqezinjtë e politikës sonë nuk kanë arritur dot”, shkruan mes të tjerash Meta në postimin e tij.

Postimi i plotë i Metës:

Kënaqësi e veçantë të uroja nëpërmjet një bisede telefonike Kampionin kuqezi, Briken Calja për fitoren e Medaljes së Argjendit në shtytje dhe të Bronzit në dygarësh, në Kampionatin Europian të Peshëngritjes në Moskë.

Një tjetër sukses i merituar personal dhe një ngjarje e madhe për peshëngritjen tonë, që për të pestin vit radhazi siguron medalje në garat ndërkombëtare konkurruese, falë talentit, punës e përkushtimit të Kampionit Calja dhe trajnerit të tij të madh Gerald Toska.

Sportistë të kalibrit të tij na lumturojnë, na nderojnë dhe na bëjnë krenarë të gjithëve. Ata janë jo vetëm model frymëzimi për gjeneratat e reja, por edhe ambasadorët tanë më të mirë në botë.

Duhet t’u jemi përherë mirënjohës dhe mbështetës të gjithë sportistëve elitarë kuqezinj si Brikeni, të cilët e lartësojnë flamurin dhe imazhin e Shqipërisë, aty ku faqezinjtë e politikës sonë nuk kanë arritur dot. Jam i bindur se sukseset më të mëdha të Kampionit tonë të peshëngritjes do të jenë ato të radhës.

LEAVE A REPLY

Please enter your comment!
Please enter your name here