Policia e Elbasanit ka finalizuar një operacion policor të koduar “Plani” me sukses. Operacioni kishte si qëllim parandalimin e një ngjarjeje kriminale, ku një shtetas me precedent kriminal kishte planifikuar të vriste një 24-vjeçar të dënuar më parë për veprimtari kriminale në fushën e narkotikëve. Policia, bazuar në informacionet e siguruara nga inteligjenca informative, ka organizuar punën për parandalimin e kësaj ngjarjeje dhe lokalizimin e shtetasit të dyshuar.
Në rezultat të kontrollit të policisë në terren, 23-vjeçari, i cili dyshohet se kishte planifikuar vrasjen, nuk mundi të kryente veprimin pasi u përball me praninë e policisë. Ai hodhi armën e zjarrit në rrugë dhe u largua për t’u shmangur arrestimit. Shtetasi 23-vjeçar është shpallur në kërkim dhe vijon puna për kapjen e tij.
Gjatë veprimeve hetimore për këtë rast, policia ka kryer kontroll në banesën e një 41-vjeçari, i cili ka një lidhje shoqërore me 23-vjeçarin. Në banesë u gjetën drogë, armë zjarri dhe municion luftarak. Sekuestrohen 2 armë zjarri (1 kallashnikov dhe 1 PMSH), municion luftarak, lëndë narkotike cannabis sativa dhe një radio si të Policisë.
Si rezultat i veprimeve hetimore, 41-vjeçari u arrestua në flagrancë dhe u shpall në kërkim shtetasi 23-vjeçar dhe një shtetas tjetër, 22-vjeçar, i dyshuar si bashkëpunëtor i 23-vjeçarit në kryerjen e ngjarjes kriminale.
Hetimet e thelluara po vijojnë nga strukturat hetimore të Drejtorisë Vendore të Policisë Elbasan në bashkëpunim me Prokurorinë, me qëllim zbardhjen e plotë të kësaj ngjarjeje. Gjithashtu, vijon puna për kapjen e dy shtetasve të shpallur në kërkim.
Materialet procedurale janë kaluar Prokurorisë pranë Gjykatës së Shkallës së Parë të Juridiksionit të Përgjithshëm Elbasan për veprime të mëtejshme.
