Drejtoria Vendore e Policisë Elbasan
Shërbimet e Komisariatit të Policisë Elbasan ekzekutuan vendimin e Gjykatës së Elbasanit, për zëvendësimin e masës së sigurisë “Arrest në shtëpi”, me masën e sigurisë “Arrest në burg”, për shtetasin N. B., 56 vjeç, pasi më datë 25.03.2026, është dënuar me 2 vjet burgim, për veprat penale “Shkelja e rregullave të qarkullimit rrugor”, me pasojë vdekjen, dhe “Largimi nga vendi i aksidentit”. Nga ky dënim, 56-vjeçarit i kanë mbetur për të vuajtur 6 muaj burgim.
Specialistët për Hetimin e Krimeve të Komisariatit të Policisë Peqin referuan materialet në Prokurori, ku nisi procedimi në gjendje të lirë për shtetasin M. T., për veprën penale “Pushtimi i tokës”.
Specialistët për Hetimin e Krimeve të Komisariatit të Policisë Librazhd referuan materialet në Prokurori, ku nisi procedimi penal për shtetasin G. Xh., 55 vjeç, pasi qeni që mbante, ka kafshuar në këmbë, një 61-vjeçar.
Specialistët e qarkullimit rrugor referuan materialet në Prokurori, ku nisi procedimi penal për shtetasit:
-R. M., 17 vjeç, pasi u kap duke drejtuar motomjet, pa leje drejtimi;
-K. M., 26 vjeç, pasi në aksin rrugor “Peqin–Elbasan”, automjeti që drejtonte, ka përplasur këmbësorin, shtetasin M. K., 35 vjeç, i cili është jashtë rrezikut për jetën;
-A. H., 49 vjeç, pasi automjeti që drejtonte në gjendje të dehur, ka dalë nga karrexhata në aksin rrugor “Rrajcë–Skënderbe”. Si pasojë është dëmtuar 49-vjeçari, i cili është jashtë rrezikut për jetën.
Materialet procedurale iu referuan Prokurorisë pranë Gjykatës së Shkallës së Parë të Juridiksionit të Përgjithshëm të Elbasanit, për veprime të mëtejshme.
