Mitingu hapës i PD-së për zgjedhjet e 25 prillit zgjati rreth një orë në sheshin “Nënë Tereza”. Lideri demokrat mbërriti në shesh rreth orës 18:10, ndërsa rreth orës 19:00 mbylli fjalimin.
Selia blu kishte zgjedhur që fjalën ta merrnin Flutura Açka, shkrimtarja që kandidon në listën e Elbasanit, aktori Neritan Liçaj, Andi Lila, Floriana Garo, e cila ftoi më pas Lulzim Bashën në podium për të hapur zyrtarisht fushatën.
Kryedemokrati iu drejtua shqiptarëve duke u thënë se planin e ka për të bërë ndryshimin por i duhet mbështetja e të gjithëve për të larguar Edi Ramën. Në fund të fjalës së tij, Basha u surprizua, pasi në skenë iu bashkuan bashkëshortja Aurela me dy vajzat, Dafina dhe Viktoria.
Në mesin e 222 kandidatëve për deputetë mungonte ish-kryeministri Sali Berisha. Ndryshe nga PS, fushata hapëse e PD-së u kthye në miting, pasi në shesh ishin mijëra demokratë me makina, flamuj, ndërsa nuk munguan edhe thirrjet kundër kryeministrit “Rama ik”.