ELBASAN- Dedë Malutaj, Vladimit Malutaj dhe Ibrahim Dragoshi janë lënë të lirë nga Apeli. Gjykata ka vendosur sot të lërë të lirë Dedë Malutaj, administrator i shoqërisë “Junik” shpk, dhe Vladimir Malutaj me detyrë drejtues teknik i shoqërise “Junik” Shpk. I lirë është lënë edhe Ibrahim Dragoshi me detyrë inxhinier dhe administrator i shoqërisë “Imes-D” Shpk, ndërsa në burg ka mbetur vetëm Ardian Lloshi me detyrë inxhinier dhe administrator i shoqërisë “Tirana New Supervisor”.
Këta persona akuzohen se kanë mashtruar Prokurorinë e Elbasanit sa i takon punimeve për vendosjen e sistemit të kondicionimit. Të tre personat ishin pjesë e disa kompanive që ishin organizuar për punimet restauruese në Prokurorinë e Elbasanit.
Në vitin 2020 në sistemin e ftohjes të Prokurorisë së Rrethit Gjyqësor Elbasan, u konstatuan disa problematika që kanë pasur të bëjnë me mosfunksionimin e aparaturës Chiller të instaluar nga subjekti ndërtues, nënkontraktor. Nga verifikimet dhe të dhënat paraprake të marra nga specialistë të fushës rezultoi se pajisja në fjalë kishte dalë nga funksionimi.