GREQI-Kryeministri grek, Kyriakos Mitsotakis mesa duket po përballet me një nga sfidat e tij më të mëdha, pas premtimit për legalizimin e martesës së të njëjtit seks duke ndezur kështu debat të ashpër në vendin e krishterë ortodoks.
Mitsotakis pranoi se përmes aftësisë së tij bindëse do të çojë përpara këtë reformë, ndërsa po kundërshtohet nga opozita.
“Unë dhe të gjithë ata që besojnë në këtë legjislacion, duhet të bindim deputetët tanë dhe më pas ata që mund të kenë ende qëndrim negativ. Ajo që do të ligjësojmë është barazia në martesë, që nënkupton eliminimin e çdo diskriminimi bazuar në orientimin seksual. Nuk është diçka rrënjësisht e ndryshme nga ajo që vlen në vendet e tjera evropiane”, deklaroi kryeministri në fillim të vitit 2024.
Ndërhyrja në këtë reformë nga lideri grek, pas mandatit të dytë, tregoi se sa e ndjeshme mbetet çështja e të drejtave të homoseksualëve në Greqi. Në një shoqëri që konsiderohet si një nga shoqëritë më konservatore të Evropës, Mitsotakis, jo vetëm po përballet me mosmiratimin e kësaj reforme, por edhe me rezistencën e fortë nga kisha ortodokse.
Klerikët kanë paralajmëruar në mënyrë të përsëritur se miratimi i martesës së të njëjtit seks do të ishte hapi i parë drejt komunitetit LGBTQ+ që merr të drejtat prindërore, deri në shpërbërjen e shoqërisë greke.
