Është ndarë nga jeta Saimir Boçi një ndër personazhet karizmatikë të qytetit të Elbasanit. Ish futbollist, kronikan dhe mësues, Saimir Boçi u nda nga kjo jetë duke lënë pas pikëllim të madh për familjen, shokët dhe miqtë e shumtë, nxënësit, kolegët dhe gjithë ata që e njohën.
Kishte një shpirt mjaft bujar. Ishte përherë i dashur dhe i qeshur. Impononte çiltërsi.
Vetë Saimiri kishte postuar tre ditë më parë një mesazh ku njoftonte për sëmundjen me të cilën po luftonte. As vetë nuk e besonte se do të ndahej nga kjo botë.
Largimi i tij është përjetuar me hidhërim veçanërisht për shokët për të cilët ai bënte aq shumë. Mjaft prej tyre e kanë shprehur vlerësimin dhe respektin për të në rrjetet sociale.
Ne po veçojmë njërin prej tyre, kushëririt të tij, ish-deputetit të PD-së Luçiano Boçi.
Ja çfarë shkruan Boçi në profilin e tij në Facebook:
I MIRI SAJMIR
Më shumë shok i imi se kushëri, Sajmir Boçi i mirë, nxitoi të kapte pafundësinë…
Iku pa një përshëndetje, i gatshëm si gjithmonë që të bënte i pari sakrificën.
Po kësaj radhe nuk e di pse zgjodhi sakrificën e jetës!?
Ndoshta për të na thënë neve që ajo vlen, pa konsideruar se ajo duhet të ishte dhe e tij.
Saja i ngjante një anije në det të hapur të trazuar, që kërkonte të rrokte përherë dallgën më të madhe.
“I keqi i vetes dhe i miri i të tjerëve”, Boçi, siç e thirrnin një pjesë e shokëve, kishte një zemër të madhe dhe një shpirt bohem.
Ngjan e pabesueshme që nuk do kemi më pranë të mirin Sajmir, shokun besnik, mikun e rrallë dhe njeriun e shumë betejave politike.
Ish futbollisti i Labinotit të Elbasanit, kronikani i çdo ngjarje të Partisë Demokratike, që nga themelimi i saj, pranë televizionit “Dardan”, mësues i përkushtuar i Gostimës, Sajmir Boçi, me turravrapin e tij drejt parajsës, la pas piketat e njeriut që meriton respekt e nderim.
Do na mungosh shumë Saje!
I lehtë dheu e ndriçoje parajsën me gëzimin tënd tipik për jetën.
Dhe atje unë kam besim tek ty!
Ne s’do të harrojmë!
InfoWebTv i shpreh ngushëllimet më të sinqerta familjes Boçi! Saimiri do të mbetet gjatë edhe në memorien e kolegëve të tij gazetarë me të cilët ai punoi për një kohë të gjatë.