Ka nisur zyrtarisht mëngjesin e kësaj të mërkure procesi i demontimit të urës së Dragostunjës, në zonën e njohur si “Arrat e Gurrës”, përgjatë aksit kombëtar Librazhd–Prrenjas, një nga segmentet më të rëndësishme rrugore që lidh Tiranën me juglindjen e vendit.
Struktura e urës u dëmtua rëndë si pasojë e rrëshqitjes dhe fundosjes së tokës, duke dalë plotësisht jashtë funksionit. Për shkak të rrezikut të lartë për qarkullimin dhe sigurinë publike, autoritetet vendosën shembjen e kontrolluar të saj.
Punimet po kryhen me mjete të rënda dhe nën masa të rrepta sigurie, pasi zona vijon të konsiderohet me risk të lartë gjeologjik. Paralelisht, ka nisur edhe puna për devijimin e rrjedhës së Lumit Shkumbin, me qëllim ndalimin e erozionit dhe stabilizimin e terrenit të dëmtuar nga rrëshqitjet masive të tokës. Mjetet e rënda po hapin një kanal të përkohshëm, i cili largon rrjedhën e ujit nga zona problematike.
Autoritetet e konsiderojnë këtë ndërhyrje si jetike për të parandaluar përkeqësimin e mëtejshëm të situatës në aksin Librazhd–Prrenjas. Një ditë më parë u demontua edhe linja 110 kV e tensionit të lartë, ndërsa sipas raportimeve teknike, lëvizjet e tokës mbeten ende aktive në disa segmente përreth.
Shembja e urës ka thelluar krizën e qarkullimit në këtë arterie të rëndësishme lidhëse, duke izoluar përkohësisht komunitete të tëra dhe duke detyruar devijimin e trafikut në rrugë alternative rurale, të cilat nuk përballojnë fluksin e shtuar të automjeteve.
Drejtori i Autoritetit Rrugor Shqiptar (ARRSH) ka deklaruar se do të nisë puna për ndërtimin e një segmenti të ri rrugor alternativ, në afërsi të zonës së prekur nga rrëshqitja. Sipas planit paraprak, rruga e re do të ndërtohet përgjatë linjës hekurudhore, në shtratin e lumit Shkumbin, dhe do të përfshijë:
-
prishjen e plotë të urës ekzistuese dhe ndërtimin e një ure të re;
-
ndërtimin e një skarpate natyrale stabilizuese;
-
sistemimin dhe disiplinimin e ujërave sipërfaqësore në të gjithë zonën e prekur nga rrëshqitja.
Autoritetet pritet të hartojnë projektin përfundimtar për një strukturë të re, të qëndrueshme dhe të përshtatur me kushtet gjeologjike të zonës. Ndërkohë, banorët kërkojnë transparencë mbi afatet e realizimit dhe garanci për një zgjidhje afatgjatë.
Aktualisht, nuk ka një afat të përcaktuar për rikthimin e qarkullimit në këtë segment jetik, ndërsa në “Arrat e Gurrës” vijon gara me kohën për të rikthyer normalitetin në një nga pikat më problematike të qarkut.
