Reshjet e shiut të cilat kanë vazhduar që prej mbrejmjes së kaluar vazhdojnë të jenë akoma prezente në vendin tonë. Në orët e mbrëmjes se sotme rrebeshi i shiut ka përmbytur me dhjetëra shtëpi në zonat periferike të qytetit të Durrësit.
Në zonën e Kënetës situata paraqitet e rënduar dhe qytetarët të shqetësuar kanë telefonuar pasi rrezikojnë përmbytjen e banesave të tyre. Uji në disa banesa ka arritur nivelin e 1 metrave pasi reshjet e shiut kanë arritur të mbulojnë katet e para të shtëpive. Disa banorë shprehin dyshimin se hidrovori i Porto Romanos nuk punon.
Dyshohet se shkak për përmbytjet është bërë rrjeti i kanalizimeve që nuk ka arritur të përballojë sasinë e madhe të reshjeve duke rritur nivelin e ujit në rrugë, gjë që ka shkaktuar disa orë më parë probleme në lëvizjen e këmbësorëve dhe qarkullimin e automjeteve.
Situata më problematike u paraqit pranë stacionit të trenit, pranë stadiumit Niko Dovana, si dhe në zonat periferike dhe rrugët që lidhin këto zona me pjesën qendrore të qytetit.
