Policia e Elbasanit ka futur në ngërç procesin gjyqësor ndaj të shumëkërkuarit Talo Çela. Prej më shumë se një muaj Gjykata e Posaçme i ka kërkuar bluve të Elbasanit, që në banesën e 51-vjeçarit, të ngjisë njoftimin se ndaj tij ka nisur një proces gjyqësorë, por ky veprim procedurial nuk është kryer ende nga policia.
Pikërisht mosnjoftimi dhe kryerja e këtij veprimi nga ana e autoriteve ligjësbatuese ka bërë që procesi gjyqësor në mungesë ndaj Çelës të mos nisë, duke shtyrë 7 seanca njëra pas tjetrës. Policia e Elbasanit ka vënë në dijeni gjykatën me një shkresë, që fleta e njoftimit nuk është ngjitur ende në banesën e personit që është kthyer në “fantazmën”, e autoriteteve.
Fleta e njoftimit, është veprimi i fundit njoftues, që do zhbllokonte procesin dhe do niste gjykimin në mungesë nga togat e zeza të GJKKO-së, përsa i përket dosjes së grabitjes së Rinasit, ku u vodhën gati 5.5 mln euro. Pas vënies në dijeni të gjykatës për moszbatimin e urdhrit të saj, policia e Elbasanit nuk ka dërguar asnjë shkresë tjetër në gjykatë, duke mos e shpjeguar as arsyen e moskryerjen e kësaj procedure.
Tashmë pritet vetëm afishimi i njoftimit në banesën e Talo Çelës, dhe ai do të përballet me drejtësinë për një nga akuzat e shumta të ngritura nga ana e institucionit të akuzës, siç është grabitja e Rinasit.
I shumëkërkuari për këtë dosje, do gjykohet veçmas anëtarëve të tjerë të grupit të grabitësve, pasi me ndryshimet e reja ligjore, çështja e një të dyshuari për vepër penale pezullohet për 1 vit, dhe nëse ai nuk arrestohet brenda këtij harku kohor, atëherë kryehen procedurat për nisjen e procesit në mungesë.
Kujtojmë se ndaj Talo Çelës, për shkak se ndodhet në arrati, është pezulluar edhe procesi për dy vrasjet e dyfishta Durrës, ngjarje të ndodhura në mars e prill të vitit 2020. Ai dyshohet se është personi që urdhëroi këto vrasje, për shkak të humbjes së një sasie të konsiderueshme parash, të grabitura në Rinas.
