Në foto: Talat Xhaferi, Massimo D’Alema dhe Ilir Kulla – Rome, 22 qershor
Maqedonia e Veriut duket se ka nisur “ofensivën diplomatike” para Samitit të Bashkimit Europian, më 23 dhe 24 qershor, ku do të vendoset për rrugën e anëtarësimit të Tiranës dhe Shkupit zyrtar. Komisioneri Varhelyi dha sot një lajm pozitiv, duke thënë se Bullgaria mund të tërhiqet nga vetoja.
Kryeparlamentari shqiptar i Maqedonisë, Talat Xhaferi ka udhëtuar drejt Italisë në një darkë pune për të siguruar sa më shumë mbështetje për Shkupin. Prej dy vitesh, Shqipëria dhe Maqedonia e Veriut janë bllokuar në rrugën e tyre të anëtarësimit nga vetoja e Bullgarisë.
Xhaferi ka zhvilluar një darkë pune me ish-kryeministrin italian Massimo D’Alema, ku i pranishëm ka qenë dhe eksperti i politikës Ilir Kulla, i cili është gjithashtu njohës i mirë i çështjeve të rajonit, shkruan newsbomb.al.
Kryeparlamentari i Maqedonisë është takuar jo më kot me D’Alemën, pasi ky i fundit është politikan i njohur me shumë influencë te e majta europiane. Në këtë darkë pune të zhvilluar në Romë, Talat Xhaferi ka lobuar për të shmangur një tjetër bllokim nga Bullgaria.