ANGLI – Si zakonisht, gjithçka që bën çifti i formuar nga Cristiano Ronaldo dhe Georgina Rodríguez, shihet me lupë. Mbështetësit dhe kundërshtarët e njërit dhe të tjetrit, shfrytëzojnë çdo mundësi për të lavdëruar ose sulmuar. Së fundmi, e dashura e yllit portugez, ka parë sesi një publikim i saj në Instagram, ka acaruar disa fansa për atë që shihet në imazh.
Ditët e fundit, pesë fëmijët e Cristiano Ronaldos kanë shoqëruar Georginën gjatë pushimeve të saj, ndërsa lojtari i Manchester United vazhdon të presë për të zgjidhur të ardhmen e tij me skuadrën angleze. Ish-lojtari i Real Madridit dëshiron të luajë në edicionin e ardhshëm të Champions League, diçka që klubi aktual nuk mund t’ia plotësojë. Modelja ka shfrytëzuar rastin dhe ka shkuar në studion e Berni Tattoo për të treguar dashurinë e saj për futbollistin, me të cilin është në një lidhje prej pak më shumë se pesë vitesh.
“Në lëkurë, shpirt dhe zemër”, ka shkruar Georgina në profilin e saj në Instagram. Pranë mesazhit, një imazh i krahut të saj që mban Bella Esmeraldën. Në krahun e së resë mund të shihej një tatuazh i ri i përbërë nga inicialet ‘C’ dhe ‘G’ dhe një zemër mes tyre. Por ajo që dukej si një fotografi e butë e një demonstrimi dashurie, u kthye kundër saj.
Edhe pse shumë prej 39 milionë ndjekësve të saj e vlerësuan aktin, të tjerëve nuk u pëlqeu ajo që panë. Shpejt, një numër i madh komentesh iu referuan pranisë së bizhuterive të ndryshme në dorën e Georgina: një orë ari dhe diamanti, si dhe katër unaza rubini dhe diamanti. “Ok, ke diamante dhe bizhuteri”, apo “Ajo është e famshmja më e vetëkënaqur në botë”, ishin vetëm disa nga shënimet e përdoruesve.
