Nga Shkëlzen Henkoja
Stuhi të fuqishmi shiu dhe breshëri kanë përfshirë sot disa zona të bashkisë së Gramshit.
Sipas të dhënave, stuhia e fuqishme ka shkaktuar shumë dëme duke rrafshuar kultura bujqësore, vreshta dhe dru-frutorë.
Sipas njoftimeve që vijnë, stuhia ka shkaktuar dëmtime të mëdha në fshatin Rovje të Njësisë Administrative Kukur dhe në disa fshatra përreth.
“Sot ishte një vapë e tmerrshme, por për 20 minuta qielli u nxi dhe nisi një stuhi e paparë breshëri dhe shiu”, tregon një fermer. I dëshpëruar ai tregon se në pak minuta breshëri i rrëzoi në tokë prodhimet duke e rrënuar ekonomikisht.
“Kemi pësuar dëme të mëdha sepse të mbjellat, vreshtat dhe dru-frutorët na u shkatërruan. Ne apelojmë për ndihmë, por nuk kemi besim se do të na ndihmojë kush”, shprehet fermeri.
Kapriçot e motit në fakt janë konstatuar edhe në disa zona të Librazhdit, Prrenjasit dhe Elbasanit, ku sipas njoftimeve reshjet kanë shkaktuar dëme të konsiderueshme në bujqësi.
