Presidenti i Ukrainës, Volodymyr Zelensky, ka mohuar akuzat e Rusisë se Kievi ka kryer një sulm me dron ndaj njërës prej rezidencave të presidentit Vladimir Putin, duke e cilësuar pretendimin si një përpjekje të Moskës për të prishur bisedimet e paqes dhe për të justifikuar sulme të reja ndaj Ukrainës.
Ministri i Jashtëm rus, Sergei Lavrov, deklaroi se Ukraina kishte ndërmarrë natën e së dielës një sulm me 91 mjete ajrore pa pilot (UAV) me rreze të gjatë veprimi, që sipas tij kishin shënjestruar rezidencën shtetërore të Putinit në rajonin veriperëndimor të Novgorodit. Rusia bëri të ditur se, pas këtij incidenti të pretenduar, do të rishikojë qëndrimin e saj në negociatat e paqes. Ende nuk dihet se ku ndodhej Putin në momentin e sulmit të supozuar.
Zelensky i hodhi poshtë këto pretendime, duke i quajtur “gënjeshtra tipike ruse”, të dizajnuara për t’i dhënë Kremlinit një arsye për të vazhduar agresionin ndaj Ukrainës. Ai theksoi se Rusia ka shënjestruar edhe më parë ndërtesa qeveritare në Kiev dhe paralajmëroi se akuzat e fundit mund të sinjalizojnë sulme të reja.
“Të gjithë duhet të jenë vigjilentë tani. Absolutisht të gjithë. Një sulm mund të nisë në kryeqytet,” u shpreh Zelensky për gazetarët të hënën, duke shtuar se komentet e Moskës përbëjnë një kërcënim të drejtpërdrejtë.
Në një reagim në platformën X, presidenti ukrainas theksoi se Rusia po kërkon arsye për të vazhduar luftën dhe e sheh çdo përparim drejt një armëpushimi si një dështim. “Është thelbësore që bota të mos heshtë tani. Nuk mund ta lejojmë Rusinë të minojë punën për arritjen e një paqeje të qëndrueshme,” shkroi ai.
