SERBI- Serbia bojkoton samitin e Bashkimit Evropian në Tiranë. Vet Presidenti serb Aleksandër Vuçiç në një intervistë për Pink Tv ka theksuar se askush nga Serbia nuk do të jetë në Tiranë në Samitin BE-Ballkani Perëndimor më 6 dhjetor për shkak të, mosreagimit të BE-së për emërimin e Nenad Rashiç si ministër në Qeverinë e Kosovës.
“ Ju bëni shënime se si Serbia është fajtore për diçka, dhe nuk mund të gjeni asgjë për të cilën është fajtore Serbia. Nuk ka problem, vetëm bëni pa Serbinë, kështu që le të shohim se çfarë do të bëni për të bërë dhe si”, theksoi Vuçiç për zyrtarët e BE-së.
Ai shtoi se kur t’i drejtohen Serbisë, duhet të kenë parasysh gjithçka që është miratuar në Bruksel, nëse është vënë në praktikë dhe të kujdesen për deklaratat e tyre dhe të respektojnë Serbinë dhe qytetarët e Serbisë.
“Unë nuk do t’ju lejoj t’i poshtëroni ata. Ju e keni bërë atë herë të panumërta dhe unë gjithmonë llogaris, ndoshta kemi gabuar, ndoshta duhet t’i lëmë të shkojnë edhe një herë…”, tha presidenti.
Ai tha se Kurti është dashur të marrë dënimin e merituar të BE-së, por nuk e ka marrë.
“Ai ka marrë diçka që ndoshta unë mund ta kuptoj, ndoshta askush tjetër. Dhe kështu sillen çdo herë, jo vetëm që kanë shkelur normat e Marrëveshjes së Brukselit, por edhe normat e së drejtës publike ndërkombëtare dhe të gjitha parimet dhe normat demokratike. Dhe nuk u intereson, prandaj kjo është në përputhje me interesat e një fuqie evropiane dhe me interesat që dikush duhet t’i zbatojë, kundër serbëve”, theksoi ai.
Të martën Tirana do të presë liderët e vendeve të Bashkimit Europian dhe të Ballkanit Perëndimor së bashku me drejtuesit më të lartë të institucioneve të Brukselit. Samiti që bën bashkë krerët e kontinentit të vjetër do të mbahet në ambientet private të Arenës Kombëtare. Axhenda e samitit do të vijojë me takime dypalëshe ndërmjet vendeve pjesëmarrëse. Kryeministri Edi Rama, Presidentja e Komisionit Europian, Ursula Von der Leyen, si dhe Presidenti i Këshillit të BE Charles Michael do të dalin në konferencë për shtyp përpara 140 përfaqësuesve të medias, shqiptare dhe ndërkombëtare, që do të zhvillohet në ambientet e Pallatit të Kongreseve.
