Presidenti ukrainas Volodymyr Zelensky shënoi sot Ditën vjetore të Dinjitetit dhe Lirisë duke iu referuar sakrificave të bëra nga populli ukrainas pas pushtimit rus dhe duke thënë se vendi i tij do të durojë dhe do të mbizotërojë.
Në një fjalim të regjistruar drejtuar kombit, Zelensky vlerësoi kontributet e ukrainasve – nga ushtarët, zjarrfikësit dhe mjekët ndihmës e deri te mësuesit që japin mësim në internet, fshatarët që gatuajnë për ushtarët, rrobaqepësit që qepin uniforma dhe fermerët që kultivojnë arat e tyre pavarësisht rreziqeve.
Ai vlerësoi qëndrimin e tyre të guximshëm pavarësisht nga sulmet e shpeshta me raketa, shkatërrimet në shkallë të gjerë, mungesat dhe ndërprerjet e vazhdueshme të energjisë elektrike me fillimin e dimrit, nëntë muaj pas pushtimit rus.
“Mund të mbesim pa para, pa gaz, pa ujë të ngrohtë, pa dritë. Por jo pa liri”, tha Zelensky në një mesazh të dërguar nga një sallë e pallatit presidencial në kryeqytetin Kiev.
Dita e Dinjitetit dhe Lirisë përkujton protestat pro-evropiane të viteve 2013/2014, të njohura si Revolucioni i Sheshit Maidan dhe Revolucioni Portokalli i vitit 2004. Në të dyja rastet, lidershipi i vendit u rrëzua.
Duke theksuar guximin e ukrainasve, videoja e Zelensky përfshinte pjesë nga mesazhi që ai dha në të njëjtin përvjetor një vit më parë, kur kishte veshur një kostum dhe kravatë. Këtë vit, ai veshi bluzën e tij të markës ‘kaki’ gjatë luftës.
“Çfarë ka ndryshuar që atëherë (një vit më parë)? Shumë. Toka jonë është plot me kratere. Në qytetet dhe fshatrat tona ka barrikada dhe barriera mbrojtëse antitank. Ndoshta është errësirë në rrugët tona. Ndoshta është ftohtë në shtëpitë tona”, tha Zelensky.
“Ka shumë ndryshime, por më e rëndësishmja nuk ka ndryshuar. Sepse gjëja më e rëndësishme nuk është jashtë por brenda. Dhe mbetet e pandryshuar. Dhe për këtë arsye ne do të rezistojmë. Do të durojmë”.
Ai tha se në të ardhmen ukrainasit do të mblidhen në Sheshin e Pavarësisë së Kievit, i cili ishte një pikë qendrore në ngjarjet e 2013/14 dhe 2004″, ku do të festojmë Ditën e Fitores së Ukrainës. Në një Kiev paqësor, në një Ukrainë paqësore”.
