Kandidatja për deputete nga radhët e Partisë Demokratike, Klodiana Çapja, ka denoncuar publikisht praninë e një shtetaseje me listë emrash pranë dy qendrave të votimit në lagjen Kala të Elbasanit, konkretisht në qendrat nr. 23/01 dhe 23/00. Sipas saj, personat në fjalë nuk janë të identifikuar dhe as të akredituar nga Komisioni Qendror i Zgjedhjeve, duke shkelur rregullat e sigurisë dhe duke ushtruar presion mbi votuesit.
“Në qendrën 23/01 dhe 23/00 konstatuam persona të paidentifikuar që qëndrojnë pa respektuar distancën e sigurisë dhe që disponojnë lista votuesish, në shkelje të drejtpërdrejtë të rregullave zgjedhore,” deklaroi Çapja. Ajo u bëri thirrje organeve të drejtësisë të ndërhyjnë menjëherë dhe të largojnë çdo individ të pautorizuar që, sipas saj, ka si qëllim intimidimin e qytetarëve.
Çapja njoftoi gjithashtu se rasti është dokumentuar me foto dhe video, dhe se do të ndiqen të gjitha procedurat përkatëse në përputhje me ligjin. Sa i përket situatës së përgjithshme në Elbasan, kandidatja u shpreh se, përveç këtij incidenti dhe një tjetër rasti ku është raportuar se persona fotografonin votën, procesi deri tani ka vijuar normalisht.
