Bashkia e Librazhdit ka organizuar një sërë aktivitetesh me rastin e 1-Qershorit, Ditës Botërore të Fëmijëve.
Në këtë aktivitet merrnin pjesë qindra fëmijë, prindër, mësues qytetarë dhe të pranishëm të tjerë.
Mes tyre ishte edhe Ministrja e Shtetit për Rininë dhe Fëmijët, Bora Muzhaqi.
Të pranishmit u përshëndetën nga Kryetari i Bashkisë, Mariglen Disha.
‘Gëzuar 1 qershorin 🎉 nga Parku i Qershive në Librazhd, mbushur plot ngjyra e argëtim 😍, por mbi të gjitha me zërat melodiozë dhe të gëzuar të fëmijëve që festojnë ditën e tyre.
Festojmë duke mësuar me këndin e bujqësisë 🌱, edukimit financiar, sigurisë rrugore 👮🏻👮🏻♂️, sportit ⛹️⚽️🏐, artit, këndimit dhe kërcimit. 💃🏻’, shkruan bashkia Librazhd.
Në aktivitetin e organizuar në Parkun e Qershive për më shumë se 4 orë fëmijët luajtën dhe u argëtuan duke mësuar së bashku, mbi kujdesin ndaj bimëve, edukimit financiar, sigurisë rrugore, artit dhe sportit.
Përveç Kryetarit të Bashkisë së Librazhdit Mariglen Disha, zv/Ministres së Shëndetësisë Denada Seferi, Drejtoreshës së ASHMF Alma Tandili, Drejtoreshës së World Vision Albania Eljona Elmazi, Edina Kozma nga UNICEF, Anila Meço nga Save the Children, Enkelejda Kallçiu nga Terre des Hommes, kësaj feste iu bashkua edhe zonja e parë, Amanda Begaj e cila vizitoi këndet e organizuara dhe u njoh nga afër me fëmijët me të cilët diskutoi edhe mbi pasionet e dëshirat e tyre.
Muzhaqi u shpreh se institucioni që ajo drejton synon që të nxisë edukimin tek fëmijët dhe të rinjtë përmes argëtimit.
“Ky 1 Qershor na gjeti me fëmijët e mrekullueshëm të Librazhdit ku kishim organizuar një sërë aktivitetesh për të festuar këtë ditë. Kishim një kënd shumë të bukur të bujqësisë ku fëmijët mësuan si të mbjellin dhe të kujdesen për ambientin, kishim një kënd shumë të bukur të edukimit financiar ku ne mësuam sesi duhet të kursejmë para, por edhe ti investojmë ato, por dhe shumë organizime sportive të cilat nuk mungojnë asnjëherë në aktivitetet tona, si volejboll, basketball, ping-pong e karate”.
Sipas Muzhaqit, të gjitha këto projekte synojnë që fëmijët të angazhohen në aktivitete me vlerë për edukimin e tyre pa e ndjerë këtë si detyrë apo kërkesë nga të rriturit. Një tjetër projekt shumë i rëndësishëm është “Tradita në Valle”, i mbështetur nga Agjencia Kombëtare e Rinisë, përmes të cilit 100 të rinj nga gjithë Shqipëria mësojnë vallet tona të bukura duke kontribuar kështu në ruajtjen dhe përcjelljen e tyre në breza. Në këtë 1 Qershor këta të rinj ndaluan në Librazhd dhe përshëndetën fëmijët dhe të rriturit me vallet popullore nga të gjitha trevat të sjella aq bukur dhe me mjeshtëri prej tyre.
Ministrja Muzhaqi shoqërohej në Librazhd edhe nga dy Junior Minister të këtij viti, një për rininë dhe një për fëmijët të përzgjedhur mes qindra aplikimeve në thirrjen për ‘Junior Minister”, një projekt që MSHRF e ka inicuar prej 3 vitesh. Alisa dhe Megi shoqëruan Ministren Muzhaqi në të gjitha aktivitetet ditore dhe u njohën nga afër me një ditë pune të një ministri.
Të rinjtë e Librazhdit në fakt nuk përfitojnë vetëm nga festat dhe takimet në ditë si kjo. Brenda këtij viti, në Librazhd do të ngrihet Qendra Multifunksionale, një projekt ambicioz i iniciuar nga të rinjtë e këtij qyteti dhe Këshilli Vendor Rinor përmes bashkisë dhe i mbështetur financiarisht Ministri i Shtetit për Rininë dhe Fëmijët përmes Agjencisë Kombëtare të Rinisë.
Ky aktivitet u mundësua nga Ministri i Shtetit për Rininë dhe Fëmijët me mbështetjen institucionale të Bashkisë Librazhd Dhe Agjencisë Kombëtare të Rinisë dhe mbështetjen e pakursyer të ëorld Vision Albania, Unicef, Save the Children dhe Terre des Hommes.
