Komisioni i Ankesave Sanksioneve nuk ka pranuar kërkesën e PD-së për 19 prova të reja sa i përket qarkut të Durrësit.
Përfaqësuesi i PD-së, Marash Logu shprehet se 34 persona mund të kenë votuar 71 herë sipas të dhënave PEI në këtë qark.
“4 persona me të njëjtin mjet identifikimi kanë votuar në 8 qendra votimi të ndryshme, 34 persona janë përdorur për identifikimin e 71 zgjedhësve. 34 persona mund të kenë votuar 71 herë, është një provë që kemi pasur mundësi ta diskutojmë edhe me qarqet e tjera, të dhënat do të përdoren nga ana jonë, po ajo që ka rëndësi është informacioni që na është dhënë në dispozicion. Pyetja ime është që a është kryer verifikimi nëse ka pasur ndërprerje dhe ka vijuar me votim manual”, tha Logu.
Ndërsa relatori i KAS, Koli Bele është shprehur se në Durrës ka pasur mosfunksionim të pajisjes PEI në 28 raste
“Nga një verifikim i bërë na rezulton që në Durrës ka pasur mosfunksionim të pajisjes PEI në 28 raste”, tha Bele.
“ Mesa di unë zoti Logu e ka bërë edhe një herë këtë kërkesë ne ia kemi rrëzuar”, tha Ledio Braho anetari i KAS.
Përfaqësuesi i LSI-së në KAS, Altin Kaziaj ka kërkuar rinumërim kutish në Durrës.
“ LSI kërkon rinumërim në Durrës. Duke uruar të mos kemi fatin e qarkut Berat. Ju po hapni precedentë të shumë diskutueshëm për të mos thënë të rrezikshme. Sa i takon pjesës së provave mbështesim kërkesën e PD-së”, tha Kaziaj.