Kur mbeten edhe pak më shumë se një ditë nga vizita e Presidentit turk Rexhep Taip Erdogan në Shqipëri, Presidenca turke publikon një artikull të zgjeruar në lidhje me marrdhëniet Turqi-Shqipëri.
Në një editorial ekskluziv për Albanian Daily News mes të tjerash citohet se ‘ Turqia është një pjesë e pandashme e Ballkanit dhe Ballkani është një rajon i domosdoshëm interesi për Turqinë. Pikëpamja e Turqisë për Ballkanin është formuar nga historia dhe kultura e përbashkët. Sidomos gjatë dy dekadave të fundit, Turqia ka bërë çmos për të nxitur marrëdhënie më të ngushta dhe më miqësore me vendet e Ballkanit’.
Më tej artikulli citon se ‘ Shqipëria është në qendër të kësaj perspektive. Turqia e sheh Shqipërinë edhe si mike edhe si aleate të natyrshme. Turqia beson se rritja e mirëqenies dhe stabilitetit në Shqipëri do t’i shërbejë paqes dhe qetësisë në të gjithë rajonin. Në këtë drejtim, Turqia ka mbështetur gjithmonë me vendosmëri zhvillimin dhe sigurinë e Shqipërisë mike dhe vëllazërore me ndjenjat më të përzemërta dhe të sinqerta dhe është e vendosur ta bëjë këtë edhe në të ardhmen.
Si rezultat i këtij vullneti, Shqipëria është kthyer në një nga vendet ballkanike me të cilat marrëdhëniet e Turqisë janë më të qëndrueshme dhe pozitive. Në kuadrin e parimit të “dialogut politik të nivelit të lartë” të politikës së jashtme turke, marrëdhëniet me Shqipërinë po diversifikohen dhe thellohen çdo vit’.
Artikulli shton se bashkëpunimi në fushat sociale, kulturore dhe ekonomike po rritet çdo vit. Marrëveshjet e nënshkruara gjatë vizitës së kryeministrit Edi Rama në Turqi në 6 janar 2021 kanë qenë një pikënisje e re dhe historike. Si rezultat i kësaj vizite, midis Turqisë dhe Shqipërisë u nënshkrua Deklarata e Përbashkët Politike për krijimin e Këshillit të Bashkëpunimit Strategjik të Nivelit të Lartë, e cila ka qenë në rendin e ditës prej vitesh, dhe marrëdhëniet mes dy vendeve u ngritën në niveli i partneritetit strategjik.
Presidenca turke nënvizon se Turqia si vend mik ka kryer mbi 3.5 miliardë dollarë investime në Shqipëri, duke përfshirë shërbimet kontraktuese. Kontributi i Marrëveshjes së Tregtisë së Lirë, e cila është në fuqi që nga viti 2008, në zhvillimin e marrëdhënieve tregtare dhe arritjen e këtyre shifrave ka qenë i madh. Në Shqipëri operojnë rreth 600 kompani turke të regjistruara dhe këto kompani jo vetëm që kontribuojnë në prodhim, por ofrojnë edhe punësim për rreth 15 mijë persona. Me këto shifra, Türkiye është një nga investitorët e huaj më të mëdhenj në Shqipëri.
Turqia ishte një nga vendet e para që i dha ndihmë vendit vëlla, Shqipërisë, pas tërmetit me magnitudë 6.4 që goditi vendin më 26 nëntor 2019, duke vrarë mbi 50 persona, duke plagosur mbi 3000 të tjerë dhe duke dëmtuar infrastrukturën e 11 bashkive. Ekipet e kërkim-shpëtimit u dërguan me shpejtësi për të nxjerrë qytetarët shqiptarë nga rrënojat. Më shumë se 500 shtëpi u ndërtuan nga Administrata e Zhvillimit të Strehimit të Turqisë (TOK?) për familjet e viktimave në Laç të Shqipërisë, në një përpjekje për të lehtësuar të paktën një pjesë të vuajtjeve të shkaktuara nga tërmeti.
