Sot, në Sallën “Boris Trajkovski”, sipas planit për imunizim masiv të popullsisë së Republikës së Maqedonisë së Veriut, do të vaksinohen deputetët dhe një pjesë e nëpunësve që nuk ishin të përfshirë nga vaksinimi i mëparshëm.
Ministri i Shëndetësisë, Venko Filipçe së bashku me kryetrin e kuvendit Talat Xhaferi kanë ndjekur nga afër procesin e vaksinimit të deputetëve të Kuvendit të Maqedonisë së Veriut. Filipçe bëri të ditur se deputetët do të pranojnë vaksinën Sputnik V.
“Të gjithë ata kanë të drejtë të vendosin nëse duan ose jo të vaksinohen. Atyre u është ofruar mundësia e vaksinimit dhe u takon vetë atyre të vendosin nëse duan ose jo të bëjnë këtë”, ka deklaruar Xhaferi.
Kryeparlamentari Xhaferi tha se shpreson që ky proces do të mundësojë punë më të efikase të Kuvendit dhe se nga gjysma e dytë e majit, puna t’i kthehet normalitetit.
Sa i përket vaksinimit, Ministri i Shëndetësisë, Venko Filipçe tha se me imunizimin e ditës së premte konsumohet dërgesa e vaksinave Sputnik V dhe më shumë se gjysma e 1,000 dozave të vaksinës kineze Sinofarm.
Të hënën Maqedonia e Veriut siguroi 10,600 vaksina Pfizer ndërsa deri në fund të muajit pret edhe 10 mijë të tjera sikur edhe 200 mijë vaksina kineze Sinofarm.
“Mbërritja do të përkojë me Festën e Pashkëve dhe vaksinimi do të nisë nga 4 maji, pra pas festave. Deri atëherë, të gjitha sallat sportive në gjashtë qytetet e planifikuara do të jenë gati për vaksinimin masiv”, ka deklaruar Filipçe.
Lidhur me situatën me koronavirus në Maqedoninë e Veriut, Filipce ka thënë se përveç numrit në rënie të personave të infektuar dhe të shtruar në spital, po vërehet rënie edhe në numrin e ekzaminimeve në qendrat për koronavirus.
Për lehtësimin e masave do të vendoset në fillim të javëss së ardhshme dhe nga qeveria kanë paralajmëruar hapjen e sektorit të gastronomisë si dhe shkurtimin e orës policore.
infowebtv
