Presidenti i Republikës, Ilir Meta ka reaguar për lajmin e vrasjes së policit nga kolegu i tij, mbrëmjen e djeshme në Komisariatin nr.3 në Tiranë.
Gjatë një postimi në rrjetet sociale, Meta ka shprehur ngushëllimet për familjen e Çaush Saliasi, po ashtu apeloi për analizë dhe reflektim të thellë të strukturave përkatëse të Policisë së Shtetit.
Reagimi nga Presidenti Ilir Meta:
“Duke shprehur ngushëllimet më të sinqerta për familjen e oficerit të ndjerë të policisë Çaush Saliasi, që humbi jetën mbrëmë vonë, i qëlluar me armë zjarri nga një koleg i tij në ambientet e Komisariatit të Policisë nr.3 në Tiranë, apeloj me forcë për një analizë dhe reflektim të thellë nga strukturat përkatëse të Policisë së Shtetit për parandalimin e ngjarjeve të tilla, që tronditin rëndë besimin e publikut te ky institucion.”
