Presidenti i vendit Ilir Meta ka reaguar në lidhje me zjarrin e qëllimshëm e vendosur ndaj godinës së njohur me emrin “Sarajet” në kryeqytet, e cila rezulton një monument kulture.
Meta shprehet se sot Tirana u zgjua me një monument kulture më pak dhe se ky akt kriminal vitet e fundit është përdorur rëndom për ndërtimin e kullave.
Teksa e cilëson aktin si një gjenocid kulturor, Meta kërkon nga SPAK të nisë hetimet në lidhje me rastin në fjalë dhe të vendosë përpara përgjegjësisë penale frymëzuesit dhe përfituesit e këtyre akteve.
Postimi i plotë i Presidentit Meta: Tirana u gdhi sot me një tjetër monument kulture, “Sarajet”, gati të shkrumbuar nga zjarrvënia e qëllimshme.
Ky akt kriminal dhe i dënueshëm është përdorur rëndom vitet e fundit, për t’i hapur udhën ndërtimit të kullave, “lavatriçeve të pastrimit të parave” në kryeqytet, siç denoncojnë edhe organizatat prestigjioze ndërkombëtare.
Viktimë e “piromanëve” ra pak ditë më parë edhe kurora e gjelbër në “Pallatin e Brigadave”, ku gjithashtu është planifikuar të ndërtohet një kompleks kullash.
Babëzia e shfrenuar e betonit në Tiranë ka shkatërruar shumë monumente historike, tradicionale, kulturore dhe objekte të rëndësisë së veçantë, ndërkohë edhe ato pak të mbetura rrezikohen të zhduken përgjithmonë.
Gjenocidi kulturor, barbaria ndaj identitetit tonë kombëtar dhe kushdo që luan me zjarrin për përfitim personal në dëm të interesit publik, meriton të ndëshkohet me të gjithë ashpërsinë e ligjit.
Nxis organin e Prokurorisë, SPAK si dhe të gjitha institucionet ligjzbatuese përgjegjëse të marrin çdo masë efektive për hetimin me transparencë dhe nxjerrjen para drejtësisë penale të autorëve, frymëzuesve dhe përfituesve të kësaj veprimtarie kriminale.
