Ministria e Jashtme e Zvicrës tha se një punonjëse në ambasadën e saj në Iran ka vdekur në një aksident.
Sipas agjencive iraniane të lajmeve, ajo ka rënë nga një ndërtesë shumëkatëshe, pranë Teheranit.
Ministria e Jashtme zvicerane tha se ajo dhe ministri i Jashtëm, Ignazio Cassis, janë të tronditur nga vdekja tragjike dhe se i shprehin ngushëllimet më të thella familjes.
Cassis tha se autoritetet zvicerane janë në kontakt me familjen e gruas. Ministria nuk e identifikoi viktimën dhe nuk dha detaje mbi aksidentin. Policia iraniane tha se ka hapur hetime të rastit.
Agjencia iraniane e lajmeve Mehr citoi zëdhënësin e shërbimit të emergjencave, Mojtaba Khaledi, të ketë thënë se viktima ka qenë sekretare e parë në Ambasadën e Zvicrës dhe se është gjetur e vdekur pasi ka rënë nga një ndërtesë shumëkatëshe në Kamranieh, aty ku edhe ka jetuar.
Kamranieh ndodhet në skajin verior të kryeqytetit Teheran. Khaledi tha se trupi i diplomates u gjet nga një kopshtar.
“Shkaku i rënies së saj nuk është përcaktuar ende”, tha Khaledi.
