Ishte duke shkuar në punë, kur u përplas nga një mjet “Audi”, në aksin rrugor Shijak – Xhafzotaj, Durrës.
I dërguar me urgjencë në spital, Dalip Gjoka, 62-vjeçari me origjinë nga Dibra dhe prej shumë vitesh banor në Xhafzotaj, nuk arriti të mbijetonte.
Babai i 5 fëmijëve ishte me çantën e bukës në dorë dhe po përshkonte rrugën drejt vendit të punës, kur ndodhi përplasja fatale. Fatkeqësisht, ai nuk mundi të mbërrinte kurrë në destinacionin për ku ishte nisur.
21-vjeçari A.L. që drejtonte mjetin “Audi” u shoqërua fillimisht në ambientet e policisë për veprime të mëtejshme proceduriale, ndërsa disa orë më pas policia njoftoi se e kishte arrestuar në flagrancë.
“Specialistët e Qarkullimit Rrugor në Drejtorinë e Policisë Durrës, arrestuan në flagrancë shtetasin A. L., 21 vjeç, banues në Xhafzotaj, Durrës, pasi ditën e sotme në Xhafzotaj, ka aksidentuar këmbësorin shtetasin D. Gj., 62 vjeç, i cili si pasojë e plagëve të mara ka ndërruar jetë në spital. Materialet i kaluan Prokurorisë së Rrethit Gjyqësor Durrës, për veprime të mëtjeshme”,- njoftoi policia për ngjarjen. Syri.net
