Pas institucionit të Kuvendit, duket se dhe Agjencia Kombëtare e Shoqërisë së Informacionit po përballet me sulme kibernetike.
AKSHI ka njoftuar ditën e sotme se ka rënë pre e sulmeve kibernetike, teksa shton se situata është rikthyer në normalitet pas rreth 60 minutash dhe faqet qeveritare janë sërish në funksion të plotë. Sipas njoftimit, sulmet nuk kanë lidhje me sigurinë e sistemeve dhe të dhënave në to, por vetëm me bllokimin e faqeve publike.
“Informojmë opinionin publik se aktualisht gjendemi nën sulme masive, të shpërndara të formatit ‘Distributed Denial-of-Service’ (DDoS) duke bllokuar rrjetin me tentativa ilegjitime aksesimi të faqeve publike. Situata është rikthyer në normalitet pas rreth 60 minutash dhe faqet qeveritare janë sërish në funksion të plotë. Theksojmë se sulme të tilla nuk kanë asnjë lidhje me sigurinë e sistemeve dhe të dhënave në to, por vetëm me bllokimin e faqeve publike.
Prej kohësh Shqipëria ka qenë nën vëmendjen maksimale të sulmuesve dhe keqbërësve kibernetikë.
Siguria kibernetike dhe e informacionit është një nga sfidat më të mëdha në epokën digjitale. Identifikimi në kohë i kërcënimeve, reagimi i shpejtë, dhe forcimi i sigurisë është një proces kompleks i cili kërkon vëmendjen e duhur dhe marrje masash të përshtatura sipas kohës dhe mënyrës së sulmeve, rast pas rasti”-njofton Agjencia Kombëtare e Shoqërisë së Informacionit.
Kujtojmë se Kuvendi nxori ditën e djeshme një njoftim, ku thuhej se kishte rënë pre e një sulmi kibernetik. Hakerat kishin tentuar të fshihnin të dhënat, por sipas zyrës së shtypit të Kuvendit, asnjë infomracion nuk është prekur.
