Rruga e fshatit turistik të Dardhës u bllokua pas mesnate për shkak të reshjeve të dëborës që përfshinë edhe Voskopojën e Qafën e Qarrit në Juglindje.
Rreshjet gjatë natës kanë qenë me intensitet më të lartë , duke arritur deri në 20- centimetra trashësi në disa zona.
Për të hapur rrugët gjatë natës është punuar për pastrimin e tyre me dy borëpastruese në Dardhë, një në Voskopojë dhe një në Qafën e Qarrit.
Këtë të hënë, sipas autoriteteve, të gjitha rrugët janë të hapura dhe qarkullohet pa probleme dhe pa nevojën e zinxhirëve.
Por policia këshillon drejtuesit e mjeteve që duhet të jenë të pajisur me goma dimërore për të shmangur çdo rrezik që mund të krijohet në rrugë.
Reshjet e shiut e dëborës kanë krijuar problematika të shumta edhe në qarkun e Kukësit.
Në disa rrugë ka pasur rrëshqitje dherash dhe inertesh.
Më problematike mbetet situata në aksin Bajram Curri – Valbonë, ku rrëshqitjet janë të pranishme në disa pika të rrugës.
Autoritetet rajonale thonë se aktualisht po punohet për normalizimin e situatës në rrugët rurale, ndërsa të gjitha akset kombëtare raportohen të kalueshëm.
Në qarkun e Shkodrës ndërkohë, Thethi mbetet pothuajse i izoluar pasi trashësia e dëborës arrin deri në 1 metër.
Nga Qafa e Thorës deri në brendësi të fshatit turistik lëvizin vetëm makinat e larta.
Në pjesën tjetër të vendit, moti karakterizohet me reshje shiu e temperatura të ulëta.