Atmosfera në Ditën e Verës në Elbasan nuk është e njëjtë me vitet kur nuk ekzistonte pandemia, mirëpo janë bërë përpjekje që të mos humbet tradita e kësaj feste.
Pandemia ka kushtëzuar festimet në këtë ditë të rëndësishme për qytetarët e Elbasanit, gjë e cila ka prekur edhe shitësit, aktiviteti i të cilëve varet nga kjo festë, dhe që thonë se këtë vit të ardhurat nga shitjet kanë qenë të ulëta.
Për festën e Ditës së Verës ka folur edhe Kryetari i Bashkisë së Elbasanit, Gledian Llatja, i cili deklaroi se është munduar që të ruhet tradita, por duke pasur si qëllim kryesor ruajtjen e shëndetit.
“Në radhë të parë më lejoni t’i uroj të gjithë qytetarëve të Elbasanit dhe qytetarëve shqiptare gëzuar Ditën e Verës. Ardhtë e begatë dhe me shëndet në familjet tona. Festimet e Ditës së Verës kanë pasur pikërisht këtë qëllim të ruajmë shëndetin dhe traditën e Ditës së Verës. Vjet në fakt ishte viti i parë që pas shumë kohësh që nuk festohej Dita e Verës. Këtë vit po fillojmë dalëngadalë, ashtu sic po fillojmë të marrim veten nga pandemia, ashtu po fillojmë dhe me ditën e Verës me aktivitete shumë të vogëla. Mbrapa kemi një ekspozitë kulture. Janë të gjitha aktivite që nuk grumbullojnë njerëz, aktivitete që bëhen në ajër të pastër,” tha Llatja.