TIRANË- Ish shefi i krimeve i policisë Elbasan i është drejtuar me rekurs Gjykatës së Lartë për heqjen e masës së sigurisë “arrest me burg”. Çështja ndaj tij është regjistruar nga Gjykata e Lartë dhe do shqyrtohet nga anëtarja e kësaj gjykate Albana Boksi.
Ditën e djeshme, gjykata e Posaçme rrëzoi kërkesën e ish-shefit të Krimeve të Policisë Elbasan, Leonard Palushi për ndryshim mase, duke e lënë pas hekurave.
Leonard Palushi u arrestua në maj të këtij viti pas dëshmisë së dëshmitarit të drejtësisë Nuredin Dumanit, se ish-efektivi ka bashkëpunuar me grupet kriminale në Elbasan. Sipas dëshmisë së Dumanit përballë prokurorëve të SPAK, Erjon Alibej, i dyshuar si organizator dhe porositës i vrasjeve të Emiljano Ramazanit dhe Regis Runajt, kishte përdorur njohjet me efektivin e policisë për të devijuar hetimet për vrasjen e Emiljano Ramazanit në Elbasan, ngjarje e ndodhur në gusht të vitit 2020.
Palushi ka mohuar akuzat, ku sipas tij ai ka ushtruar vetëm detyrën dhe nuk ka pasur asnjë bashkëpunim me grupet që operojnë në Elbasan.