Riciklimi është jetik për grumbulluesit e plastikës dhe mbetjeve të tjera të riciklueshme në bashkinë Elbasan.
Mbi 90 riciklues u bënë bashkë nga Qendra EPER duke u informuar dhe konsultuar për punën të lidhur me ndarjen e mbetjeve urbane të ripërdorshme. Ky aktivitet vjen në kuadër të projektit “Fuqizimi i të drejtave të punës së Romëve dhe Egjiptianëve në Riciklimin e Mbetjeve” zbatuar nga Qendra Mjedisore për Mbrojtje, Edukim dhe Rehabilitim (EPER Center) dhe Shoqata “Romano Sezi” Elbasan me mbështetjen financiare të LevizAlbania, një projekt i Agjencisë Zvicerane për Zhvillim dhe Bashkëpunim, SDC.
Qëllimi i takimeve ishte identifikimi i problematikave dhe rritja e edukimit të ricikluesve romë dhe egjiptianë. Takimet u zhvilluan në banesa dhe pikat e riciklimit të mbetjeve në Rrapishtë, lagjen “Beqir Dardha” dhe “Emin Matraxhiu” në bashkinë Elbasan. Ndër pikat e rëndësishme ishte njohja me rregullat e sigurimit teknik në punën me mbetjet, si operon ky sektor i menaxhimit të mbetjeve dhe tregu i mbetjeve të riciklueshme. Një tjetër temë e rëndësishme e prekur gjatë këtyre takimeve ishte ndalimi i mbështetjes së ekonomisë familjare për shkak të punës informale të ricikluesve si dhe punësimi i fëmijëve të tyre.
Një tjetër komponent i rëndësishëm i projektit është përgatitja e një raporti studimor me temë Vlerësimi e punës së grumbulluesve individualë në riciklimin e mbetjeve në bashkinë Elbasan. Njëkohësisht do të fillojë edhe regjistrimi i grumbulluesve individual në riciklimin e mbetjeve nga bashkia e Elbasanit.
Ricikluesit jo vetëm krijojnë të ardhura por i bëjnë një nder të madh mjedisit pasi grumbullojnë plastikën, një material që kërkon shekuj të dekompozohet dhe shkakton një dëm të madh në ambient.
