Shkodra është një nga qarqet më interesante sa i takon garës ndërmjet kandidatëve të së njëjtës parti, ku deri në momentet që flasim, kur janë numëruar 244 kuti nga 411 qendra votimi në total, Bardh Spahia, i cili renditet i shtati në listë, ka shanse që të thyejë herësin duke siguruar një vend në parlamentin e ardhshëm.
Spahia ka siguruar derimë tani 4598 vota nga 9 400 që i duhen për të thyer herësin dhe për të spostuar Zef Hilën që pozicionohet në vendin e 5-të në listën e partisë. Mbetet për tu parë sesi do të vijojë gara mes tyre, pasi ende nuk dihet nëse janë hapur zonat ku secili prej tyre ka pasur më shumë ndikim.
Në kampin e socialistëve, Ilir Beqaj duke parë shifrat e deritanishme duket se e ka të pamundur që të thyejë Benet Becin që renditet i treti në listë, ndërkohë që e para e socialistëve në Shkodër, Edona Bilali ka marrë derimë tani 1689 vota. Në rast se ajo nuk do të ishte renditur e para në listë nga Edi Rama, Beqaj, Stërkaj dhe Beci do të kishim marrë mandate të sigurta.
Për të thyer herësin një prej kandidatëve në listën e PS-së i duhen më shumë se 10 mijë vota, dhe teks shihet trendi, Beqaj e gjen veten jashtë Kuvendit, me shpresën se dikush prej kolegëve të tij shkodranë do të bëhet ministër, për ti hapur atij rrugën si deputet.