TIRANË- Një vajzë e re britanike ka humbur jetën në një aksident të tmerrshëm me skaf pasi dyshohet se u godit nga një polic jashtë detyrës teksa po pushonte në Shqipëri, kështu ka shkruar revista prestigjioze botërore britanike, The Mirror. Vdekja e Jonada Avdias ka sjellë protesta në të gjithë vendin duke kërkuar dorëheqjen e kryeministrit dhe ministrave. 7-vjeçarja humbi jetën pasi polici Arjan Tase dyshohet se po manovronte rrezikshëm me skafin e tij në plazhin e Potamit në Himarë, në jug të Shqipërisë.
Policia konfirmoi se rreth orës 14:00 të së martës shoferi humbi kontrollin dhe goditi fëmijën nga Barking në Londër, i cili vdiq menjëherë në vendngjarje. Ai pritet të dalë të premten para gjykatës së Vlorës pasi u akuzua për vrasje nga pakujdesia, raporton Albania Daily News. Mësuesi i saj Beslim Ahmetaj ka shpërndarë një postim emocionues në rrjetet sociale duke thënë: “Shqiptarët po vajtojnë Jonadën dhe familjen e saj, ndërsa për ty, vrasës i fëmijëve dhe ëndrrave, nuk do të ketë varr. Drejtësia për Jonadën duhet dhe do të vendoset nga qytetarët shqiptarë”.
Ai zbuloi gjithashtu një bisedë zemërthyese që kishte bërë me babain e shqetësuar të vajzës, Bledarin. Ai tha se babai i pikëlluar i tha asaj se po mbante dorën e vajzës së tij kur ajo u godit dhe tha: “Unë duhet të kisha vdekur”. Vajza e re ishte me pushime me familjen e saj në vendlindjen e prindërve të saj, por familja thuhet se ka jetuar në Britaninë e Madhe për dy dekadat e fundit dhe Jonada ka lindur në Londër.
Për shkak të aksidentit katastrofik, shefi i policisë Gledis Nano shkarkoi rreth 15 efektivë, duke thënë se “nuk do të tolerojë asnjë oficer policie, drejtues apo zbatues që nuk zbaton me rigorozitet dhe ndershmëri detyrat funksionale, në interes të mbrojtjes së jetës së qytetarëve”. Ky është rasti i tretë në një muaj ku skafet në plazhet e Shqipërisë u shkaktojnë aksidente turistëve Me qindra qirinj dhe lule janë vendosur aty ku humbi jetën Jonada, si dhe para Kryeministrisë.
